Die Kommende Jemgum tauscht mit Dyure und Tyabe in Holtgaste Grundbesitz.

Wytlik unde kundich si allen jenen, de dessen openen breff seen ofte horen lesen, wo dat her Heuwe, commeldur to Jemmigen, unde broder Ufke, kelner darsulves, myt wyllen unde vulbort aller menen coventesbroder[*] hebben ghemaket ene wesselinghe ofte ene bu^ote myt Dyuren, Habben dochter, Tyaben wyff, up den Wolde, [*] in dem kerspel to der Holtghast, also myt seven ackeren landes, belegehen by der Sudwendinghe up dat noerden etc.; desse vorghescreven seven acker hebbet de closterlude upghedreghen unde overgheven myt vullen willen sunder arghelist Tyaben unde Dyurken siner husfrowen vorghescreven. Desghelik so heft Tyabe unde Dyurke wedder upghedreghen unde overgheven mit vryem wyllen den closterluden seven acker landes, beleghen by den closters lande up dat norden van der Sydwendynghe. Hir boven so hebbet de closterlude Tyaben unde Dyurken togheven 6 Arnsche ghulden to enen steden vasten kope to ewyghen tyden to holdende sunder jenygherleye arghelist edder ansprake van beyder siden etc. Dyt vorscreven lant gheit up to beyden syden in den moer unde uet in de Gheze to den warslote. Hir an unde aver hebben wesen to tu^oghe Gherleff up den steenhuse, Amze unde Sywert Egghele unde junghe Ulbet, kerspellude to der Holtghast, unde ok anders vele ghuder lude. To ener merer betuchnisse, so hebbe wy her Clawes, kerkher to Jemmigen, her Johan, vorwarer to der Holtghast, umme bede unde vruntschop willen unse ingheseghel ghehanghen beneden to dessen breven. Int jar unses Heren M^oCCCC^oLVI^o etc. To ener merer betuchnisse so sint desser breve twe, den enen hebben de closterlude, den anderen Tyabe unde Dyure sin husfrowe. Ghescreven uppe sunte Magnus dach des hilleghen martelers.[*]

x

x

Archief	NStA
Fonds	Rep. 1 (Große Urkundensammlung)
Toegangsnummer	R001
Inventarisnr.	0800
Jaar	1456
Datumcode	Magni

x

x

x

Commentaar	2 anhängende Siegel verloren.

x

Edities	Editie naar dit exemplaar: oub0706.