Heseko Reyndisna in Campen verkauft der Kommende Heiselhusen Grundbesitz.
Ick Heseko Reyndisna buer tho Compum enkenne unde betughe myt dessen breve voer allen guden luden, dat ick hebbe vorkoft stedelikes unde vastes kopes myt guden willen unde myt by namen hern Emmen, commendatori unde broder Hayen hoefmester tho Hesaldahusen[*] des vorwerkes, dat daer hort tho den vorg. convente, 4 grase landes, gheleghen in Comper hammerke, vaste by den vorwerke gheheten Hayo Hesekanc Feneka vor ene summe gheldes, als vor 31 Arnoldes gulden, welk ghelt my Heseken vorg. vul unde wal betalet ys na mynen willen, den ersten pennyng myt den lesten. Darumme wil unde schal ik Heseko vorg. den ghestliken luden vorg, dyt vorg. lant vry leveren vor alle ansprake al derghene, de nu leven unde gheboren werden in thokomende tyden, also dat de ghestliken lude vorg. dyt vorg. lant moghen bruken ofte vorkopen tho nuttycheyt des vorwerkes tho Hesaldahusen vorg. sunder alle arghelyst utghesproken. In oerkunde der warheyt, so hebbbe ik Heseko vorg. ghebeden herrn Clawes, curet tho Compum unde Brungher hovetlyng tho Laecwert[*] dessen breff um unsen willen tho beseghelene unde wy heer Clawes unde Brunger vorg. umme bede willen desser vorg. ghestliken luden unde um merer bewysynge desser warheyt hebben unse ingheseghele neden hangen tho dessen breve. Int jaer unses Heren dusent verhundenrt XXXV, des maendaghes vor unses Heren hemelvart.
