Das Kloster Thedinga quittiert dem Kloster Langen über 100 rheinische Gulden.
Wy broder Sybrant, ghekoren abbet to Tedinghum, [*] anders gheheyten Syna, suster Pelliken priorisse, broeder Egbert kelner, ende de ghemene conventeskyndere daerselves, doen witlick, kundich ende apenbaer allen ersamen erbaren vromen luden beyde geesteliek ende weerlick, de desen breef zeen of horen lesen, dat ons de erwerdighe gheestelike here Johannes Bomel, proest to Langhenmonken, ons van desselven conventes weghen heeft guetliken wal vorbetaelt hundert golden Rinsche gulden yn zodanen paymente, als ze de van uns hebben ontfanghen in affkortighe der summe van veerhundert Rinsche gulden, als die principaelbreef is holdende; als dat wy broeder Sybrant voerscr. ende dat ghemene convent voerscr. noch onse nakomelinghe nummermeer in tokomen tijden willen desen sulven Johannes voerscr. noch dat convent darumme manen; unde schelden ze vry unde quijt van desen hundert Rinsche gulden, alle arghelest, hulperede unde nye funde uthghesecht. In oerkunde der waerheit soe hebben wy broeder Sybrant, suster Pelliken, broeder Egbert ende dat ghemene convent ons conventes seghel gehanghen an desen breef, unde in meerre tuech der waerheit soe hebben wy gebeden dem eerbaren here heer Bernt, abbet vallis sancte Marie in Norda, dat hy oeck synen seghel ghehanghen heeft an desen breef. Ghescreven int jaer ons Heren dusent vierhundert unde neghen ende tseventich, ipso die sancti Brictii episcopi.[*]
