Der Pfarrer Ubbodus in Geerdswehr beurkundet einen Güterkauf des Klosters Langen.

Ick Ubbodus, kerckheer to Gherdesweer, do kundich unde openbaer allen den ghenen, de dessen breef seen edder horen lesen, wo vor my ys ghekomen Ouwe, zalige grote Poppo echte husvrouwe, inwoner to Folkardaweer, bekennende unde tughende in der waerheit by ere consciencie unde zalicheit erer zele, dat Poppo eer echte man vorben. unde ze tosamende hebben vorkoft rechtverdiges vryes steden kopes in voertiden zotige heren Poppo, do ter liit provest, unde deme convente to Langhen veer graze landes, ghelegen manck dat monkelant, ghenomed Ammekemeed[*] voer ene summe gheldes, de em ter kore vul unde al wal ys vernoget unde betaelt, de erste pennyngh myt den lesten. Des to tughe so bekenne unde tughe wy Herko Heddena unde Weyrdeko Remetsna, inwoners to Folkardaweer, in der warheit by unser consciencien in cracht desses breves, dat wy yeghenwordich dar mede by an unde over dessen koep unde betalinge ghewezen hebben, welk lant vorscr. wart in unse yeghenwordicheit ersten vorkoft vryes stedes erfkopes Ouwe vorben. unde Uffeko, eer erste echte man, von den erbaren vromen mannen Ocko unde Brungher zaligher dachtnisse, hovetlingh unde broderen to Loquart, unde wart en wal betaelt unde vornoget de erste pennyngh myt den lesten. In orkunde der warheit so hebben wy Ouwe, Herko unde Weydko vorben. vrentliken ghebeden heren Ubbo unsen kerckheer umme synen inghesegel, de he witliken unde myt guden willen heft hanghen to dessen breve. Na der bord Christi dusent veerhundert in deme dre unde sestichten yare, up sunte Ambrosii avent des hilgen biscops.[*]

x

x

Archief	NStA
Fonds	Rep. 1 (Große Urkundensammlung)
Toegangsnummer	R001
Inventarisnr.	0633
Jaar	1463
Datumcode	vAmbros

x

x

x

Commentaar	Anhängende Siegel beschädigt erhalten.

x

Edities	Editie naar dit exemplaar: oub0788.