| Nummer:gus0106 | Datum:19. Aug. 1498 | Overlevering:Original | Vindplaats:Rep. 1 (Große Urkundensammlung), inv.nr. 0106 |
Schreiben des Butjadingerlandes an den Grafen Edzard I. von Ostfriesland in der Angelegenheit der Erbschaft des Almer.
Demme eddelen unde wolghebaren herenn, heren Edtzardt, tho Oestfreslande graven, unsem bisunderghen ghuden frunde unde gunstighen leven heren, vrundeliken detur.
Unsen fruntliken grueth thovoren. Eddele wolghebaren heren, besunder leve ghuede frundt. Wy voghen juwen gnaden fruntliken wethen van weghen etliker klaghe an unse landt benaleth, andrepende van heren Almeres seligher dechtnisse erffghuder, un ame latesten de erwerdighen heren kerckheren, heren Doden tho Langwerden unde heren Thyen tho Equarden personeliken yn muntlike sproke an juwe ghenaden gheschicket, de denne ghudtliken juwer gnade halven entfanghen ende ghetractereth, des wy juwen gnaden hochliken bydanken. Daer furder vorredet myth juwen gnaden enen fruntliken dach tho holdende unde de sake thoer uthdracht yn fruntschuppen tho endeghende etc. Brynghen hyrup juwen gnaden fruntliken wethen, wy sodanen dach myth juwen gnaden wyllen holden, unde begheren den up der Aen, ener wonliken stede, tho scheende, daer sodane erffghudere byleghen synth, de tho beschouwende; ock umme fruchte unde vare dorch heren lande tho reysende tho mydende, nychtemyn juwen gnaden to willen, dorch unmoeth tho stillende, upm Stendamme sodanen dach myth juwen ghnaden willen holden nu thor tydt, deme doch so nycht stede vor enen plachsede tho holdende; offte jene gnade yo so were ghesynneth, den dach upm Stendamme tho holdende, willen eck gherne juwe gnade personliken umme unses vordenstes willen daer thoer stede wesen. Eddele wolgheboren heren, begheren alle dynck daerup rastliken moghe staen unde uns sodanen dach achte daghe thovoren willen wytliken, daer denne de unse yn ghuden gheleyde unde gheloven moghe an unde aff vorwareth blyven. Desgheliken de juwe ock vor uns unde de unse scholen wesen, yndeme et syck so velle, de dach myth uns up der Aen worde vorhandelt. Begheren hyrup juwer gnaden scrifftighe antwordt, daer wy uns na wethen tho holdende. Hyrmede juwe gnade tho Gade dem Heren, de se langhe salich, sunth ende vrolich spare. Ghescreven under unses landen secrete, anno etc. XCo. octavo, ame dage Magni episcopi et martiris.
Sesteyn radtgheveres ame lande tho Buthyaden.
Unsen fruntliken grueth thovoren. Eddele wolghebaren heren, besunder leve ghuede frundt. Wy voghen juwen gnaden fruntliken wethen van weghen etliker klaghe an unse landt benaleth, andrepende van heren Almeres seligher dechtnisse erffghuder, un ame latesten de erwerdighen heren kerckheren, heren Doden tho Langwerden unde heren Thyen tho Equarden personeliken yn muntlike sproke an juwe ghenaden gheschicket, de denne ghudtliken juwer gnade halven entfanghen ende ghetractereth, des wy juwen gnaden hochliken bydanken. Daer furder vorredet myth juwen gnaden enen fruntliken dach tho holdende unde de sake thoer uthdracht yn fruntschuppen tho endeghende etc. Brynghen hyrup juwen gnaden fruntliken wethen, wy sodanen dach myth juwen gnaden wyllen holden, unde begheren den up der Aen, ener wonliken stede, tho scheende, daer sodane erffghudere byleghen synth, de tho beschouwende; ock umme fruchte unde vare dorch heren lande tho reysende tho mydende, nychtemyn juwen gnaden to willen, dorch unmoeth tho stillende, upm Stendamme sodanen dach myth juwen ghnaden willen holden nu thor tydt, deme doch so nycht stede vor enen plachsede tho holdende; offte jene gnade yo so were ghesynneth, den dach upm Stendamme tho holdende, willen eck gherne juwe gnade personliken umme unses vordenstes willen daer thoer stede wesen. Eddele wolgheboren heren, begheren alle dynck daerup rastliken moghe staen unde uns sodanen dach achte daghe thovoren willen wytliken, daer denne de unse yn ghuden gheleyde unde gheloven moghe an unde aff vorwareth blyven. Desgheliken de juwe ock vor uns unde de unse scholen wesen, yndeme et syck so velle, de dach myth uns up der Aen worde vorhandelt. Begheren hyrup juwer gnaden scrifftighe antwordt, daer wy uns na wethen tho holdende. Hyrmede juwe gnade tho Gade dem Heren, de se langhe salich, sunth ende vrolich spare. Ghescreven under unses landen secrete, anno etc. XCo. octavo, ame dage Magni episcopi et martiris.
Sesteyn radtgheveres ame lande tho Buthyaden.
x
| Archief | NStA |
|---|---|
| Fonds | Rep. 1 (Große Urkundensammlung) |
| Toegangsnummer | R001 |
| Inventarisnr. | 0106 |
| Jaar | 1498 |
| Datumcode | Magni |