Die Häuptlinge Eggerd und Keno von Loquard huldigen den Grafen Enno I., Uko und Edzard I. von Ostfriesland.

Wy Eggerdt unde Keno, ghebroder, to Loquardt ende in den Hamme hovetlinge, enkennen ende betugen inne dussen unsen openen besegelden breve voer alle den ghennen, de ene seen off horen lesenn, dat wy samentlick voer uns unde alle unser beyder ervendt unde rechter anneervendt, borenn unde ungeborenn, hebben ghelovet unde myt uppgerichten vingeren stavedes eedes lyfflick hebbenn inne denne hilligen ghesworen, denne eddelen unde walgeboren unsenn gnedigenn leven junckheren Ennen, Edzarde unde Ukenn, ghebrodere, grevenn inne Oestvreslande, unde alle erer ervendt unde rechte anneervendt, boren unde ungheborenn, truw unde huldt to wesenn to allen tyden, by nacht unde by daghe, ere best to doen, ere archst toe kerenn, ene alle ergenamt myt unsen lyve unde guede toe denen unde bystandich to wesen, gelijck yenich andere riddermate schildtboertige manne na eere ende recht by eren natuerliken rechtenn landesherenn schuldich unde plichtich synnen toe doen, dat wy gebroder ergenamt loven unde guetseggenn inne macht dusses yegenwordigen breves samentlick sunder yenich argelist by sodane lofte unde eede, so wy gedaen hebben inne gueden truwen vullenkomen na allenn unsen vermogenn wall to holdenn. Toe bekantnisse der waerheit hebbe ick Eggerdt ergenamt myn rechte ingesegell voer my unde voer Kenen, mynen leven broder, anne dussenn breeff ghehangen, daer my Keno ergenamt wal an genoget, wante ich noch ter tijt sulftes nyn segell ghebruke. Gheven toe Loquardenn, inne deme jaer na Christi geboert M^o veerhundert veer entachtentich, des vrydages na Pancratii et Servatii.

x

x

Archief	NStA
Fonds	Rep. 1 (Große Urkundensammlung)
Toegangsnummer	R001
Inventarisnr.	0070
Jaar	1484
Datumcode	MpExaudi

x

x

x

Commentaar	Anhängendes Siegel erhalten.

x

Edities	Editie naar dit exemplaar: oub1132.