Ocko Brungersna in Loquard bestätigt dem Junker Ulrich Cirksena den ihm von seinem Vater eingeräumten Besitz im Auricher- und Brokmerland.
Wytlick unde kundich zy allen ersamen vromen luden, de dessen breff zen, horen .offte lesen, woe dat dar ertydes twischen de ersamen unde walgebornen juncher Olricke to Gretsyl, Norden, Aurike, Emden, Berum etc., in Oestvreslande hovetlinge unde sinen erven up ene, unde Brunger, to Lockwerd unde Loppersum hovetlinge, zaliger gedechte unde sinen erven up ander ziid, ene vullenkomene vaste zone unde entlike unvorbrecklike vrundscopp vorramet, gedegedinget unde besloten ys, soe van allen schelingen und twidracht under en malkanderen upgestan unde vorresen, dar en gud besegelt schiin up vorramet unde besegelt ghewesen ys, inholdene, woe de vorben. Brunger vor eme unde sine erven, geboren unde ungeboren, vrundliken myd guden willen deme vorben. juncheren Olriken unde sinen erven, gheborn unde ungeborn, tor vrundscopp unde entliken ewigen zone hadde unde hevet upgedregen unde gegeven an ener rechten, steden, ewigen, erffliken gave alle dat erve, werve, borchstede unde herlicheit, de eme unde sinen kinderen unde erven in Aurike- unde Brokmanne lande van ervetals wegene mochten behorlyck unde andrepende wesen, so dat de vorben. erbar juncher Olrick unde sine erven desse vorben. erve, werve, borchstede unde herlicheit eweliken nae eren willen moghen bruken unde eren erven vorterven sunder Brungers offte jemandes van syner off syner erven wegene rechte bysprake, ok sunder jenigerleie hulperede off intoch. Welke zone, vrundscopp unde gave ick Ocko Brungersna, to Lockwert unde Loppersum hovetling, an desseme jegenwordigen breve sterke, vortsette unde geve, de in vuller macht vort vor my unde myne erven, gheborn unde ungeboren, to ewigen tyden sunder argelist stede unde vast so to holdende ane jenigerleie hulperede. So geve ick over alle rechte geistlich unde warlick, de my mochten denen tegens desse vorscr. uplatinge, unde love vor my unde myne erffnamen de nummer to brukende tegens dessen breff unde nene hulpe uth den rechte off anders hyrtegen to sokende by myner zelen in gudeme loven, went boven sodane vordrach unde zone my Ocko vorben. unde mynen erven de vorben. juncher Olrick sunder klage off eschend myd guden willen unde vrundscopp elven stige grese landes myn 2 1/2 gras in Westerhuser, Frebessumer unde Midlumer hammerke liggende uthwiset unde gegeven hevet erfflick egen to besittende unde to holdene, off nae unseme willen darmede to donde, woe id my unde mynen erven belevet, darumme ufft myn vader zaliger ghedechte in der vrundscopp unde zone wes behalet unde benouwet were, ick unde myne erven uns der benouwinge myd desseme vorscr. erve weder bekomen vorhalen unde entsetten mogen. Ok hevet de erbenomde erbar juncher Olrick myn neve zaligen Mauricius Kancken kinderen gegeven unde vornoghet achte stige grese landes vor dat vorwerck, dat juncher Keen deme kloster to Ile entferdiget unde genomen hadde unde siner suster mede geven hadde to brutscatte, worumme dat vorwerck van zalige Mauricius kindere vorlaten unde so gude unde quitt geschuldich ys in ere vredeliken were. Worumme ick sinen gnaden hochlicken dancke, unde schelde den vorben. mynen leven neven unde sine erven aller ansprake van der erve, werve, borchstede unde herlicheit wegene vorben. quyt, ledich unde loes, so dat ick unde myne erven darvan unde van aller vergangen schelingen unde twidracht in tokomenden tiiden nummer up den vorben. juncher Olrick unde sine erven, born off ungeborn, klagen off spreken willen off schullen sunder argelist. Wer ock in Aurike- off Brokmanne lande van junchers Ocken erve unde lande jenich lant off erve, dat von juncheren Ocken off mynen vader rechtliken nicht vorkofft en were, dat wise ick Ocko vorscr. unde make vulmechtich den vorben juncheren Olrike unde sine erven gensliken dat to sinen willen to manende unde to vordernde an sine vullen hebbenden were to vorsettene, to vorkopende off sinen erven vort to ervende, woe eme dat belevet sunder myne unde myner erven bysprake, so vorscr. ys. Dessen to merer kenntnisse unde bewisinge, hebbe ick Ocko vorben. myn ingeseghel vor my unde myne erven witliken myd guden willen hangen to desseme breve, unde hebbe ok vurder ghebeden de prester unde kerchvoghede to Marienhove umme unser leven Vrouwen seghel, unde de erwerdigen inneghen dogentsamen heren hern Bernde, des olden klosters to Norden, unde hern Gerde, des klosters to Ile abbaeten, umme ere seghele, unde den ersamen gloriosen doctor mester Siben, to Marienhove kercheren, unde Bolo Ripperda to Fermissum unde Uneken sinen zonen to Widwert hovetling unde provest to Fermissum umme ere seghele, zee umme myner bede unde meren sekerheit willen mede wolden doen hangen vor dessen breff, deme zee umme myner vrundliken bede unde begherte willen zoe gedaen hebben. Datum anno Domini millesimo CCCCoLXo, die proxima post festum beate Dorothee virginis.
