Bündnis zwischen dem Häuptling Ulrich Cirksena und den Ländern Östringen, Rüstringen und Wangeren.
Ik Olrik to Emeden, Norden, Awerke etc. unde to Ezense hovetling, bekenne openbare in dessem breve vor allisweme, dat ik dorch guder endracht unde vredes willen mi mid den gemenen insetenen der lande Osteringen, Rusteringen unde Wangeren vrundliker vorgan hebbe in desser nascrevener wise, dat alle twidracht, veide unde unwille, de twisschen den insetener der vorscr. lande uppe ene, unde mi, mynen landen, luden, unde undersaten uppe andere syde, wente uppe dessen jegenwardigen dach, gifte desses breves, sin gewesen, gentsliken unde entliken gesoned, gevredet unde in desser wiis gesloten sind, dat ik, mine erve, unde nakomelinge, sodanner twidracht, schelinge, veide unde unwille uppe de insetene der vorscr. lande nicht wil witen, wecken edder mid arge dencken, edder vormiddelest anderen personen van myner wegene, witen, wreken edder mid arge dencken laten. Wurde ok jenich twidracht unde schelinghe twisschen mi, minen vrunden, landen, luden, undersaten unde nakomelingen uppe ene unde den insetenen der lande Osteringen, Rusteringen unde Wangeren uppe andere siide, samentliken ofte bisunderen in tokomenden tiiden, dat God verhode unde afkeren mote, sodanne twidracht unde schelinge schole wii unde willen uppe desulven insetene der vorscr. lande mid rove, brande, beschedeginge edder jenigerhande anevange ofte overvalle nicht wreken edder vorhalen; men wii willen unde scholen dat den borgermeisteren unde radmannen der stad Hamborch witlik don unde vorkundigen unde binnen sulliker tiid alse uns denne van densulven borgermeisteren unde radmanne der stad Hamborch wert verkundiget, unsse ansprake unde clage, de ik, mine vrund unde undersate tegen de insetene der erberen lande samptliken ofte bisunderen hebben, den gennen den wii anspreken unde beclagen willen, overantworden in scriften dar denne de genne binnen dersulven getekenden tiid de also beclaged werden in scriften wedderumme up antworden scholen unde sodanne scriftlike ansprake unde antworde den borgermeisteren unde radmannen der stad Hamborch ok binnen sulliker tiid alse uns an beiden siiden van densulven borgermeisteren unde radmannen der stad Hamborch gescreven wert, insenden to Hamborch, van welliken borgermeisteren unde radmannen vorscreven wy uns in vrundschoppen nach unsser beider willen edder in rechte nach inneholde unsser overgevene klage unde antworde sunder beropinge, vorscheiden unde entweileggen laten scholen unde willen, beholden mi, minen frunden unde erven unde nakomelingen des, dat desse vorscrevenen sone, vrundlike endracht unde tohopesettinge der vrundliken tosate unde endracht twischen den ersamen borgermeisteren unde radmannen der stad Hamborgh uppe ene, unde mi unde Idzerde ichtiswanne mynem broder, milder dechtnisse, unssen vrunden, erven unde nakomelingen uppe andre side, gemaked, vorbreved unde vorsegeld nicht to vorvange unde hindere schal wesen, men allikewol twischen mi unde den mynen unde densulven borgermeisteren unde radmannen der stad Hamborch unde den eren schal geholden werden unvorbroken. Alle desse vorscrevenen wort unde artikelle love ik Olrik vorbenant vor mi, mine erve unde nakomelinge den insetenen der vorscreven lande Ostringen, Rustringen unde Wangeren, eren erven unde nakomelingen truweliken unde vastliken to holdende sunder jenigerleye argelist, unde hebbe des to tuge unde bekanndnisse min ingesegel witliken unde mid gudem willen hangen heten to desseme breve. De geven unde gescreven is na Godes bord verteinhundert jar, darna in deme twe unde veertigesten jare, uppe des hilligen crucis dach invencionis.
