Die Häuptlinge Edzard Cirksena und Eppo von Westerbroke bezeugen, daß Uko Fockena in Oldersum die gleichen Rechte hatte wie vor ihm Ocko tom Brok.

Wytlick, kundich unde openbaer sy allen erbaren gueden luden, de dussen breff zeen off horen lesen, dat wy Edserd in der Greed unde Norderland etc. unde Eppo to Westerbroke hovetlinge bekennen unde betugen clarliken in der warheit vor allesweme myt crafft dusses breves, dat wy daer yeghenwordich mede an unde over weren in der tiit, alse Uko zalgher dechtnisse Uldersum overgaff in der meente hand, dar openbarliken waert ghedeghedinghet unde in gueden loven uthghesproken tusschen zalghe Uken vorg. unde der meenheit in desser wyse unde maneer so hiir naghescreven steyt: Dat he unde syne rechte erven myt vreden unde mit ghemake solden besitten, bruken unde beholden to synen besten all dat erve, wes darto horde in sulker mathe, so yt de ersame juncker Ocko zalgher dechtnisse wandaghes plach to bruken in syner besittinghe, do he des slotes mechtich was. Bidde wy leffliken myt vruntliker begheringe allen erbaren guede mans, de umme unsen wylle doen off laten wyllen, dat ze syck mytten besten na orer gunst hiiryn bewysen, dat desse vorg. vorword unde deghedinge truweliken worde gheholden, so syk dat van rechte borth. Dat is uns vorben. hovetlinge sunderges to wyllen. In orkunde der warheit, so heb ick Edserd vorg. myn ingesegel voer Eppo myn swagher unde vor my witliken drucken heten beneden up dat spacium desses breves. Screven na der borth Christi M^oCCCC^oXXXVIII^o, des mydweken na unser leven Vrouwen daghe nativitatis.

x

x

Archief	NStA
Fonds	Rep. 1 (Große Urkundensammlung)
Toegangsnummer	R001
Inventarisnr.	0003
Jaar	1438
Datumcode	EpNatMar

x

x

x

Commentaar	Aufgedrücktes Siegel verloren.

x

Edities	Editie naar dit exemplaar: oub0499.