| Nummer:oub1286 | Datum:Emden, 16. Juni 1491 | Overlevering:Editie | Vindplaats:Ostfriesisches Urkundenbuch, II, S. 324, nr. 1286 |
Der Landrichter Johann Huesman von Ostfriesland entscheidet einen Streit zwischen den Erben des Hero Ebbena und dem Johanniterordenshause Heiselhusen, welches sich den Niessbrauch der Ebbena'schen Erbgüter angemasst hatte, zu Gunsten der Ersteren.
Ich Johannes Huessmann, der grevescap Oestfrieslandt landtrichter, bekenne unde betuge myt dessem myne openen besegelden breve vor alsweme, dat vor my yn gerichte synnen gekomen in bywesent des erafftigen mester Dyrck Valkens, provesten to Lheer ende kerckheeren to Lherlt, unde Haro Wynckens, amptmans tho Emeden etc., Hero Ebbena soens tho Woltzeten, hebben sick beclaget, wo dat conventh tho Heyseldehusen boven yenich reedelich bescheet hefft eer vaderlicke erve gebruket, so dat belegen ys tho Heyseldehusen negest den convente, unde ene angearvet ys van eren vader unde grotevater, daer se to manigen tyden yn gerichte umme geklaget hebben; up welkerne de ersame her Johan, commissarius der cloestere sancti Johannis yn Ostfrieslandt unde commendator tho Oesterwehrum, antworde, so he volmechtig was gemaket van den werdigen unde gestrengen heren Harborde van Snetlage, balyer to Steinforde, als syne werdicheit de sake sulffs yn gerichte hefft gebracht, unde ene vulmechtig gemaket, entlichen na landtrechte daerby tho blyven van wegen des vorgescr. convents, wo dat vorscr. convent tho Heyseldehusen hadde yn vorleden jaren dat vorbenoempte erve gehuert van Heren Ebbena sulffs, by eren convente tho ewygen tyden to blyven. Oeck na lude eyns besegelden fruntschapsbreeff van den duchtigen Hayen tho Papenborch mylder dechtnisse, unde Ubben tho Uplewerden besegelt, so de under anderen articulen begript, dat de vorscr. Hero Ebbena kynder dem vorscr. convente toe Heyseldehusen sodan landt unde uterdyck, als eer selige vader Hero dem convente verhuret hadde, unde daer se na vorworde up getymmerth ende gebouwet hebben, soelen laten bruken voer de hure tho ewigen tyden; up welkere artikele Here soens antworden, weret sehe, dat convent konde bewysen, dat eer vader off grotevader dem convente sodane landt hadden verhuret yn maten so verscr. ys, dann wolden se samptlichen dat convent sodane erve willichliken na beschede laten bruken. Daerup ys deme commissarius gevraget, do he sede, dat convent hadde dat landt van Hero Ebbena gehuret, so vorscr. ys, off he des oeck yenich bewyes hadde, als liggende urkunde, breeff, segele, ofte levendige tuge; antworde de vorscr. commissarius, eer bewyes weer vorbrandt unde de levendige tuge weren verstorven. Hyrumme heb ich Johannes ergenant na klage unde antwordt van bevele des edelen unde wolgeboren heren Edsardes, graven tho Oestfreslande, myns gnedigen leven herens, den vorscr. Hero Ebbena soens eer vaderlike erve myt landtrechte weder thogescheden, uppe dat negestkomende yaer na dato dessen breves weder antofangen unde na eren vryen wyllen tho gebruken, nademe dat convent nicht konde bewysen, dat se sodane erve hebben gehuret van Hero Ebbena kynder, van eren vader unde grotevader. Weer oeck sake, dat commissarius vermoede hierentegen noch yenich bewyes to bringen, eme behulpelich offte vorderlich yn synem rechte mochte wesen, mach he brengen tuschen desser tydt unde visitationis Marie. Ock hebben Hero Ebbena kynder buten rechtes erkantniss willichliken angenomen, off de commissarius behorige dispensatie konde warven, dat sodane husere, staende to Heyseldehusen, mochten weederkomen tho warltliken handen, nadem de gheestlich synnen, willen se geerne na erkantnisse guder lude up mogelike tydt unde stunde betalen; vorder van der verschenenen hure soelen se beydenthalven fruntschapsluede erkantnisse guetliken rekenen unde betalen tuschen desse tydt ende sunte Michaelsdage erstkomenden. Oek off Hero Ebbena kynder dan na belevendt des commissarius de husere an sich nemen, so moegen se de nastaende hur daran korten. Tho urkunde der waerheyt hebbe ick myn ingesegell an dessen breeff gedruckt beneden upt spacium. Gescheden to Embden, in den yaer na Christi geboerth anno XCIo, des negesten donderdages nha Viti et Modesti martyrum.[*]
