| Nummer:oub1273 | Datum:15. Aug. 1490 | Overlevering:Editie | Vindplaats:Ostfriesisches Urkundenbuch, II, S. 317, nr. 1273 |
Beurkundung eines Verkaufs von 14 Grasen Landes seitens des Feyke und der Hylset an den Häuptling und Propst Garrelt Beninga zu Grimersum und Hinte.
Ick her Hyndryck, karckher tho Grymersum, erkenne vor alsweme, wo vor my synnen gekamen de frame lade Feyke und Hylset, syne echte husfrowe, hebben vorkoft und upgedragen und overgegeven vor one und vor ere lyvesarven, de von uns ofte von den eren geslehte mogen kamen, se synnen gestlych edder werchlych, dussen koep nummer tho straffen, dem erbaren und erehaftygen Garreldt Benyngha, tho Grymersum hovetlynck und pravest tho Hynte, und syne husfrowe, fruwe Esse, und ore lyvesarven, ses grase landes, geheten yn Weeme landt, und achte grase in Harevenne, welck uns Feycke und Hylset vorgenompt vul und al ran den ergenanten Garreldt, pravest etc., den ersten pennynck myt den lesten synnen betalet; hyrumme ich Wyltet, een soen der beyden als Feyke und Hylset, tugesluden dusses kopes, (!) hebbe geseen und gehoeret, dat myn salyge vader und moder vullenkamen er geldt van dat vorgeschreven landt hebben geboret van den pravest gotsaliger vorgenompt, hyrumme yck Feyke vor de nageschreven tuge fruwe Eesse und oren kynderen dat landt fry und quydt hebbe thogestaen und noch vullenkamentlyck overgeve; de tuge synnen als Remet Eggen, Tyade Mammen, hyllyge mans tho Grymersum, de hyr sunderlychen tho geeschet, geropen und gebeden synnen; doch tho merer bevestenysse, confirmation und bestentenysse dusses breves hebbe yck Garreldt Benyngha, pravest etc., gebeden mynen leve genedyge heren dussen breef vor my und myne arfgenamen tho besegelen, und wy Enno, grave tho Ostfreslandt, hebben unse segel an dussen bref laeten hangen. Int yar nae Gades geboerte dusent verhundert und negentych, up unser lever Fruwen dach assumpsionis.
