Vertrag zwischen der Gräfin Theda und ihren Kindern und den Häuptlingen Poppo, Dido und Edzard Manninga wegen der Hinterlassenschaft der Tyaetque.

In den namen des Heren. Amen. Kundich unde openbair syd allen unde eynen itlyken bisundern, de dessen breff zehen offte hoeren lezen, dat eyne sone, vruntscap unde ene entlyke schedynghe ys ghedegedinget unde ghemaket twischen der eddelen walghebornen vrowe Theden, greffynne in Oestfrieslande, eren kynderen by der enen, unde den erbern vromen unde duchtighen junckhern Poppen Mannynghe to Pewessum unde Jenleth, Dyden unde Edzarde, ghebroederen, to Lutesborch unde Bergum hovetlingen, van der anderen syden, van den klaeghen, anspraeken unde tosaeghen, de de vorbenompten junckhern sick vormeten to hebbene uppe de ergenanten vrowe Theden greffynnen unde ere kyndere, saekende ende heerkomende umbe seligen Tyaetquen, Elen dochter naghelatene erve unde guedere, [*] in desser nabescrevener wyse, alzoe dat de upbenompte greffynne van weghene erer kynder schall gheven unde uthwysen den vorscr. junckhern achte styghe deymede landes, beleghen uppen Dorpen, daerto gheven unde betalen dredusend unde vier unde twintich Arnsgulden in ghelde, den gulden to 15 krumstert nu ter tyd ghenghe; dat eyne tusend unde de 24 Arensgulden voir de naestandighen hur underenthe van den vorscr. erve. Dat ander dusend voir de dusend Arnsgulden, de salighe greve Oelryck gueder dechtnisse in syner lesten kranckheyt selighen vrowe Adden syner suester hadde besproken to ghevende; unde dat derde dusend in eyne sone unde vruntscap up dat alle unwille de vruntliker unde lefflyker werde unde bestandich blyve. Unde dessen summen gheldes to betalende itlikes jaers enen summen, als nu to des hilghen Kerstes hilghen daghen erstkomende vierhundert Arnsgulden; daernae over eyneme jaere to des hilghen Kersten oek vierhundert Arnsgulden, voirt an des derden hilghen Kersten desghelyken vierhundert Arnsgulden unde alzo voirt an hen soe langhe, dat de voirgheroerde summe gheldes alynghe betaelt weerde. Desse betalinghe salt men uthgheven unde entfanghen jaerlix to Norden int olde cloester, unde alzo vakene alze de vorg. junckhern enyghen summen den ersten, anderen, dredden, vierden unde alle de anderen to synen termynen entfangen unde upboren, soe schollen dei junckhern vorbenompt soe vakene ene qwitancien van sodanen entfanghenen summen wedderumbe gheven in besegelden breven in datsulve cloester by eynander to legghende. Oek alze eyn der velebenompten greffynnen soene junckher Enno, off eyn der anderen broedere, soe oelt werdet unde to vollen jaeren komet, soe sall he den vilghenompten junckhern Poppen, Dyden unde Edzarde, ghebroederen, eyn sulvern schenckvatt gheven, soe guet off quaet, alze junker Enno off eyn syner broedere sulffs willen. Hiirmede sall alle tosaghe, anspraeke, klaeghe, unwille unde ghebreke inne nederghelecht unde entliken mede vorsonnt, ghesloten, affghedaen unde gheslichtet wesen, nun unde to ewighen daglien ane jemandes weddersegghend. Schedesheren in dessen vorgheser. ghebreken synnen ghewesen van parte de veleghenompten greffynnen an der eren kynderen: wy Bernhardus, abt to Norden, Hieko Maurizes, licenciaet in legibus, Hero Maurizes gliebrodere, hovetlinghe to Dornum; van parte unde syden der upbenompten junckhern: Henrieus van Reers, abbet to Adewert, Onno Ewessena ritter, unde Johan Renghers ton Poeste, hovetscap unde borgermester to Groenyngen, daerto samptlyken ghekoern unde volmechtieh ghemaket, desse vorghescr. sone, vruntscap unde schedinghe eyndreehtigen ghededingliet ghemaket unde uthspreken loten. Hiir hebben mede by ', ade over ghewesen de erber her Reyner, perpetuus viearius to Emeden, de ersamen vromen manne Haye tor Papenborch, proest to Leer, Ubbo to Pleghewert hovetlingh, Ast to Pilzum, Hayke to Marienhove unde Ulbet Manena to Norden, amptlude, voir tuegheslude dairto gheeysehet unde ghebeden. Desses tor orkunde der waerheit hebben wy Thede greffynne vorbenompt voir uns, unse kyndere, unde wy Poppo, Dydo unde Edzard upgenompt unse rechte zeghele, unde noch vorder to merer vestinghe unde vvitliekheil hebben wy vorbenompten schedesheren unse inghezegele mede taten hanghen unde ghehanghen an dessen 1, reff, der de vilghenompte greffynne unde de ghenompten junckern unde broeder eyn itlick part eynen to sick hebben ghenomen.
Ghegheven nae Christi glieboert vierteynhundert in deme vier unde tseventighesten jare, uppe den guedenstagh voir sante Mertens des hilghen biscops daghe.

x

x

Fonds	Ostfriesisches Urkundenbuch, II
Fol.nr.	S. 39
Nr	940
Olim	Orig. Perg. im Besitze des Grafen Edzard zu Inn- und Knyphausen zu Lütetsburg.
Jaar	1474
Datumcode	DaMartin

x

x

Commentaar

Von den Siegeln sind nur Nr. 2 und 3, und zwar diese sehr gut erhalten. Nr. 2 enthält ein Wappenschild mit rechtsaufgerichtetem Löwen, als Helmschmuck einen wachsenden Adler, von jeder Seite des Helmes ein Stern. Uinschrift: S. Poptati capitalis in Berghum. Nr. 3 enthält dieselbe Darstellung ohne die Sterne, ist jedoch bei Weitern nicht so gut gearbeitet. Umschrift: 8. Didonis eapitalis in Berghum.

x

Materiaal	papier

x

Edities	E. Friedländer, Ostfriesisches Urkundenbuch II (Emden 1881), nr. 940