| Nummer:oub0580 | Datum:Esens, 23. Juli 1447 | Overlevering:Editie | Vindplaats:Ostfriesisches Urkundenbuch, I, S. 508, nr. 580 |
Schiedsspruch der Hamburger Rathssendeboten in Streitigkeiten mehrerer Ostfriesischer Häuptlinge.
Des sondaghes vor Jachoppy was beredet en dach an den XLVII jare tweschen Lubben Oneken unde Tannen uppe ene syde, Eden Boghens unde Syrke uppe ander syde, na enen resses unde vorwort, dat tosamt her Olryk to Watwerden, Tanne Knaben, Alleke, Yken Onneken sone, unde Hinrykes scryver to Ghever, dat dar ut sproken wart, dat alle seghel unde breve, resesses unde alle schedinghe, de me bewisen mochte, schal stan an vuller macht, unde wes beyden parden dar baven schelde uppe mallikanderen to sprekene, setten se by den ersamen rat to Honborch ut to seghende to vrenschup ofte to rechte; also deden de ersame rat van Honborch sennen boden an den kloster to Esense, dar an unde over was de ersamen heren, her Direk Baller, provest to senten Steffen, her (Johan Vredewold)1) provest to Emeden, juncher Olryk hofling to Essense etc., her Olryk to Wadwerden, Direk Bardewis, Wilken Vrese, drosten to Oldenborch etc., Hinrek Cluke, des rades sendebode to Bremen, Tanne Kanken, Maryses Kanke unde Knop to Oldenborch unde vele vromer lude; an dat erste, dat de kerken, de se beset haden, schullen se rumen unde godeshus bliven unde de husyn[*] schal synes erves unde gudes bruken unde der wedder ingan unde en nenen overval do men eren rechten broke, unde Tanne unde Lubben schulden sytten an aller rechtegheyt unde herlicheyt, daruppe hebbet se vredeboden to beyden syden des achten daghes na Pingsten by ener pene dusent Rynscher gulden, dat se belevet unde willekort hebbet, ander deser tyt wil de ersame rat den utspreke don na klaghe antworde, to vrenschup ofte to rechte myt worden ofte an scryft dar ere brefe uppe maket syn beseghelt. Ok segheden den ersamme rates[*] sennboden, dat Here schal wedder uppe de borch an syn hus unde schal overgheven de kerken unde bruken des stenhuses half, unde den slotel darmede to hebben unde synes erves bruken so he van der borch gynge unde en den anderen nenen overval don. Ok segheden my to her Johan Gerwien unde her Wilmen Brant, dat de rat van Honborch boven seghel unde breve unde schedinge nycht dar mer up scheden willen, anders wolde Lubbe unde Tanne myt eren vrenden weg reden hebben uppe den dingsedaghen avent van Esermonken, do se my boden senden by Tannen Kanken.
