Burgemeesters en raad van Groningen verklaren een verdrag te hebben aangegaan met het convent te Gerkesklooster.

Wy, borghermestere ende raet van Groninghen, bekennen ende betughen met dezen openen breve, dat wy
ziin overdraghen met den abte ende met den oldermans ende met den menen convente van Gherkes
cloester in dezer manyer: Hevet jenich conventesman to claghen up eneghen man in onser stad, so sulle wy hem rechtes helpen na onsen stadrechten
over dwersnacht sunder verweygheringhe. Ende weert sake dat wy des nyet en deden, als de abt dat an ons met enen breve vervolghet hevet, daerna
so moghen zie onzer borgher gued in den lande daervor becummeren sunder onsen toren ende ovelen moet, mer neghenen onschuldighen umme des anders
scult to becummeren. Ende velle ons anders jeneghe schelinghe ondertuschen, daer sulle wy umme tosamen komen bynnen Groninghen een(s) des jaers
des Maendaghes na Paeschachtende of dicker, ende sullen dat onder ons zelven scheyden met mynnen of met rechte. Ende deze vors. ponten love wy
den abte ende den menen convente vors. stede ende vast to holden, al wanter tiid dat zie ons of wy hem dat een jaer to voren upsegghen. Al
arghelist uetghesproken. In orkunde so hebbe wy onser stad seghel an dezen breef ghehanghen. Ghegheven int jaer ons Heren dusent drehondert dre
ende neghentich up onser Vrouwendach Nativitas.

x

x

Fonds	Oorkondenboek Groningen en Drenthe
Nr	856
Olim	Naar het origineel in het rijksarchief in Friesland (Gerkesklooster, no. 120), hoog 10,5, breed 24 cm.
Jaar	1393
Datumcode	NatMar

x

x

Commentaar	Aan het stuk hangt een brok van het zegel van de stad Groningen met contrazegel.

x

Materiaal	papier

x

Edities	P.J. Blok e.a., Oorkondenboek van Groningen en Drente, II (Groningen 1899), nr. 856.