| Nummer:oub0494 | Datum:24. Mai 1358 | Overlevering:Editie | Vindplaats:Ostfriesisches Urkundenbuch, I, S. 441, nr. 494 |
Wibet von Stedesdorf und Ulrich von Greetsiel schenken dem Kloster Marienkamp oder Esingervelde ein Stück Etlandes bei Margens.
Wy Wypt van Stedesdorpe ende Uelrick Ennen soen, hoeftlinghe ende richters in Herlinghen, Aurikerlande ende Noerderlande tughen ende bekennen in desen openen breve voer ons ende voer onse rechten eerffghenamen, dat wy myt vryen wyllen ende myt voerbedachten moede toe der eren Godes in een ewig testament omme salicheit onser sielen ende onser olderen ende vrenden, hebben ghegeven den cloester ofte convente Mariencampe, anders ghehieten Esinghervelde van der Reguliers oerde, gheleghen in den kerspel van Ezense, een stucke landes ghehieten Ettenlant, gheleghen by Merghense[*] opt Osten; welck voerscreven lant ons nae den dode Jabbe Ynkens Beven, Wypts voerscreven suster, myt rechte anghecomen is, alle argheliste utghesproken. In een oerkunde ende tuech der waerheit, soe hebben hyr an ende over ghewesen eersame lude, alse her Here, her Hayng ende her Eylart, kircheren toe Ezense, ende heer Aelbert kircheere toe Weenre, ende Ludeken, grote Ludekens soene, ende oeck andere eersame lude ghenoch; ende omme merer sekerheit ende ghelove der waerheit soe hebben wy Wypt ende Ulrich hoeftlinghe voerscr. onse ingheseghelen an dessen breeff doen hanghen. Ghegheven in den jare ons Heren dusent vierhondert ende achtendertich, up sunte Urbanus avent, des heilighen paewes ende martelers.
