Die Königlichen Abgesandten übergeben die Verwaltung des aus Sibets von Rüstringen Botmässigkeit gegangenen Butjadingerlandes der Stadt Bremen.
Syfryd van Wendinghen ritter unde Niclas Buntzlow van deme alderdorluftigsten vorsten unde heren, hern Sighemunde van Godes gnaden Romschen konynghe to allen tijden merer des richs unde to Ungheren, Bemen, Dalmacien, Croacien etc. konynge vulmechtich in Vreyslant ghezant, don kunt allen luden unde bekennen mit dessem openen breve, want dat lant to Butenyaden twischen der Jade unde der Weser, dat uet der besehermynghe unde ghebede Sibetes gheghanghen ys, nu manighe tijt unde jare in krighe, unvrede unde in unraste by em sulven gheleghen hefft, darumme ok allerleye koplude unde andere ghude lude, de dardorch unde darbij ghewandelt hebben to watere unde to lande uppe des hilghen rikes straten, deste unveligher gheweset hebben unde darumme de sulven lande in raste, vrede unde eyndracht to bringhende unde den ghemenen man, de des hilghen rikes straten dardorch unde dar umblanck ghewandelt, to watere unde to lande in velicheit to setten, unde umme andere ghemene nutticheit willen, so hebbe wij in stad unde van weghen unses alregnedigsten heren, heren Sigismundes Romeschen konynghes etc. vorscreven unde des hilghen rikes, den wisen unde beschedenen borgermesteren unde raedmannen der stat Bremen van dersulven stat Bremen weghen dat vorscr. lant to Butenyaden mit synen inwonren, gherichten unde anderen tobehoringhen bevolen[*] to regherende unde to vorwarende bet to unses alregnedigsten heren, heren Sigismundes, Romschen koninghes etc. vorscreven edder synre nakomelinge in dem hilgen rike wedderropen unde in sulker maneren, dat de sulven borgermestere unde raedmanne der stat Bremen nymands in dem lande gheseten enygerleye watt don, unde na eren besten vlite unde vermoghen vorwaren scholen, dat allermalk in dem lande geseten he sy ho edder de syde, [*] arm offte rike, up syn erve unde gut kome unde vor den anderen seker unde velich sitten unde wonen moge, unde offt yenich man upp den anderen ichtes to to seggene hedde, dat ze in mynne effte vruntschap nicht gescheden konden, dat ze darumme mit rechte gescheden werden na des sulven landes Butenyaden recht, unde oft de sulve unse alregnedigster here, her Sigismundus Romscher koning etc. off syne nakomelinge in dem hilgen rike in tokomenden tijden desse unse bevelinge wedderropen worde mit eren openen breven, so scholen de borgermestere unde raedmanne van der stat Bremen weghen dat regiment des landes van Butenyade vorscreven wedder aftreden, so vruntliken alse ze zijk des van unser bevelenisse weghen anghenomen hebben, unde scholen des hilgen rikes beste proven[*] unde schaden vorwaren, alze des hilgen rikes getruwen, alze dat billik unde mogelik ys. Des in tugnisse der warheit hebbe wij Sifrid van Wendinghen ritter unde Nicolaus Buntzlow ambaxiatores vorbenomed unse ingesegele hangen to dessen breve, de geven is na Godes bort verteynhundert unde twintich jare, an unses Heren lichams avende.
x
| Edities |
E. Friedländer, Ostfriesisches Urkundenbuch I (Emden 1878), nr. 275 |
