Het klooster ter Apel eenerzijds en de gemeene buren van Werdinghen in Drenthe in 't karspel van Empne met consent van Wolter Stelling ‘ambtman to Covorden und slandes van Drenthe van wegen des edelen uns gnadigen heren van Utrecht’ anderzijds, verklaren, dat zij gescheiden zijn betreffende alle zaken, die zij onder elkaar hebben gehad, bepaaldelijk van een deel van de mark van Werdinghe, dat ‘de proevest'van Schiltwolde’, die vroeger een ‘verwaerrer’ van het klooster ter Apel was, van de buren van Werdinghe heeft gekocht en wel met deze bepalingen dat prior en convent zullen hebben het land in de mark van Werdinghe, dat gelegen is bij 't klooster ‘up de riviere de Ae geheiten’ enz. Prior en convent zullen daarvoor jaarlijks ‘to ewigen tiden’ betalen aan de buren van Werdinghe ‘op avent’ der heilige Apostelen Philippus en Jacobus ‘meiavent’ geheeten ‘teen olde Vlemsche’. Met deze deding zullen dood wezen alle voorgaande contracten, tenzij de genadige heer van Utrecht voor zijn aandeel dit verdrag herroept.

Kundich und openbaer zij allen luden de dessen breff
lezen, zeen offte horen lezen, dat wij broder Hinrick van den
Berghe, broder Gheert, procurator, broder Ludolphus und voirt
ghemene conventuale des cloisters orden des Hillighen Cruces
to Nyenlichte, Apell in 't ghemene geheiten, up de ene und wij
Willem Heminck, Johan Battinck de Olde, Willem Weykinck, Lam-
bert Hominck, Arndt Houwart, Albert Alekingh, Willem Ykinck,
Willem Altingh, Willem Battingh und Willem Dutscheer
als ghemenen buren van Werdinghen in Drenthe in den
kerspel van Empne myt consent unde todoen des erboren
unde vromen Wolter Stellings, amptman to Covorden und 's landes
van Drenthe van weghen des edelen uns genadigen heren
van Utrecht up de anderen zijde, gementliken an beiden
zijden bekennen und betughen in dossen openen besegelden
breve dat wij tozamende in 't fruntscappen verdragen
synt und gescheiden van allen zaken und onwillen wij toza-
mende onder malkanderen, went up data dosses breves gehat
hebben, sonderlinghe van een dele der marken van Werdinghen
vors. als die provest van Schildwolde, de in voertiden een ver-
waerrer des cloisters to Apel vors. plach to wesen, dat van den
buren van Werdinghen gekofft unde betalet hevet in maniren
nabescreven. In 't erste dat prior und convent to Apel vors. und
ere nakomelingen sullen hebben und bruken to ewigen tijden tot
eren willen als eer eygen guet alsodane guet, grond, brueck unde
land van der marken van Werdinghen als gelegen is bij den
cloister vors. up den ryvere de Ae geheiten van den leemkulen
de geleghen synt tusschen den cloister vors. und Rossvinkel bij de Ae
vors. lijnrecht uuit in 't westen went in 't middel des waters de
Musla geheiten, lanck und breet, lanck und breet [sic!] bij der Musla
als bij der Ae toe hebben. Dyt land, grond, broick und velt als
dat ghelegen is van den leemkulen na der Muslen so vors.
is voert na Westerwolde, soe lanck und breet als tusschen der
Ae und Muslen so vors. is na Westerwolde de marke van Wer-
dinghen gheet, sullen hebben, bruken und besitten prior und
convent van Apell vors. und ere nakomelinghen tot ewighen
tijden na eren willen, in lande, in sande, in holte, in wene, in
heide und weide und in allen maniren so men een eyghen
vridorslachtich guet to hebben und to bruken und to besitten
plecht, daermede to doen und to laten na eren orbar und wil-
len wes em ghenoget buten den buren van Werdinghen offte yummants
van erer wegen opspreken, besperinghe off ovelen
moet, des sal prior und convent vors. voirtan van data dosses
breves to ewighen tijden gheven und wal betalen den buren
van Werdinghen vors. und eren nakomelinghen alle jare op avent
der hillighen apostolen Philippi et Iacobi, Meyavent geheiten, to Werdin-
ghen in der burschap in eens buermans huis teen olde vlem-
sche offte ander payment dat in der tijt der betalinghe daer guet
voer is offte enen arnhemschen gulden xv krumstert in der tijt der be-
talinghen to Groninghen genaftich vor den gulden na wille und koer
priors und conventes to betalen. Und off daer gebreck in velle oick
van wat saken dat queme als dat de betalinghe up tijden, ste-
den und maniren so vors. is nicht en schege, so moghen de buren
vors. also vaken als dat gescheet de renthe vors. des anderen dages
daerna dubbelt manen sonder des cloesters weddersegghen
eder ovelen moit. Voirt bekennen wij parthen vors. zementliken an
beiden zijden dat myt dosser dedincgen und dosseen tegewordighen
breve doet sollen wesen, onmachtich und van gener macht offte
werden alle breve, vorwarden, dedincge, scrifften offte bewijs,
besegelt off onbesegelt de wij parthen op malkanderen off myt
malkanderen van kope, pachtinge offte bepalinge van warschap
des grondes und landes vors. in den Harhuse toe doen und van
allen zaken de van allen dossen voerbenoempden guden voer data
dosses breves gehad hebben also dat onser parthen geen myt olden
offte nyen breven offte anders in yenigerleye wis in yenighen
rechten op den anderen an sall spreken, vorder off anders dan dos-
se tegenwordighe breeff begrepen hefft, ten were de gnadige
here van Utrecht van sijnen dele wes wederropende van dos-
sen onsen verdraghen worde als dem solden olde scrifften und
breve van waringhe unde anderen zaken na andele de heren
van Utrecht vors. volmachtich bliven. Alle argelyst und nye vunden
uutgesproken. Wanttan alle dedincghe und zaken tusschen onss
beyden parthen gescheen und gemaket so vors. is ware synt und
wij die an beiden zijden vast ond onverbroken angenomen hebben
to ewighen tijden to holden, hebben wij tozamende gebeden demen
erbaren und vromen Wolter Stellingh, amptman to Covorden und 's lan-
des van Drenthe, de ersamen heren Johan van Rode, heren Egbert,
kerckheren to Roiswinkel, und Roloff Husinghe, schulte to Empne,
dessen breff vor onss und over onss to besegelen. Dat ic Wolter, amptman
vors. mijns ghenedighen heren van Utrecht to Kovorden unde des
's landes [sic] van Drenthe van weghen der buren van Werdinghen vors.
omme bede willen priors und conventen vors. und mede van mijn
amptman weghen, omme dat mijns heren genade vors. in der marken
van Werdinghen vors. mede gewaret is, so vere und langhe mijns
heren gnade van sijnen andele nicht wederropende is, an dossen
breff mijn segel gehanghen und wi Johan van Rode, Egbertus to Rois-
winkel und Roloff, scholte vors., omme beider parthen vors. beden
willen und oic omme dat wij mede over dosse fruntlike dedincghe
und scheidinghe gestaen hebben. So hebben wij ellic vors. in een
recht orkonde unde tuch der warheit onsse segelen beneden an dos-
sen breeff gehanghen. In den jaer onss Heren dusent vierhondert
unde eenentsoventich, in profesto sanctorum Gervasii et Prothasii martirum.

x

x

Archief	Groninger Archieven
Fonds	Klooster Ter Apel
Toegangsnummer	1373
Inventarisnr.	0001
Fol.nr.	fol. 004r
Regestnr.	22
Register Feith	(1471.018)
Jaar	1471
Datumcode	GerPro

x