| Nummer:gus0021 | Datum:9. Jan. 1455 | Überlieferung:Original | Fundstelle:Rep. 1 (Große Urkundensammlung), inv.nr. 0021 |
Quittung der Stadt Hamburg über 10000 lübische Mark für die Überlassung von Emden und Leerort an den Junker Ulrich Cirksena.
Wii borghermeistere unde radmanne to Hamborch bekennen unde betughen openbare in unde mit desseme breve vor alle den ghennen, de ene zeen, horen edder lesen, dat wii van deme erbarn junckhern Olrike, to Noerden, Berum, in de Greet, Aureke, Brokmerlande, Lenghen etc., in Oestfreslande, hovetlinghe teindusent Lubessche mark in gudeme ghelde, alse to Hamborch ghenghe unde gheve is, to unnsseme willen upghebort, entfanghen unde de vort in der stad Hamborch witlike nut, orbar unde beste ghentzliken keret hebben. Unde sodane teindusent Lubessche mark scholen wii borghermeistere unde raedmanne vorbenomet hebben, beholden, unde der to der stad Hamborch profite unde beste bruken, alle de wile, dat wii unnsse stad unde slot Emeden unde unnsse slod Lerord mit eren tobehoringhen, de junckher Olrick vorbenomet in vorwaringhe van uns heft, van eme edder sinen erven nicht wedder esschen. Ghevellet over, wan de jar in den hovetbreven[*] twisschen junckhern Olricke, uns unde unnsser stad glegheven unde bezegheld umme komen weren, dat wii borghermeistere unde radmanne to Hamborch edder unnsse nakomelinghe, wanner des rades worden, dat wii na lude dersulven hovetbreve unnsse stad unde slote mit eren tobehoringhe van junckhern Olricke edder sinen erven wedder esschen, innemen unde sulves vorwaren wolden, welk denne staet to unnsseme willen, so scholen unde willen wii borghermeistere unde radmanne to Hamborch edder unnsse nakomelinghe deme vilghenanten junckhern Olricke edder sinen rechten erven, er wii de vorscrevene stad unde slote innemen, teindusent Lubessche mark rouweliken binnen Emeden weddergheven unde nogaftighen bereden mit gudeme ghelde, alse denne to Hamborch ghenghe unde gheve is to ener tid, unde an enen summen. Alle desse vorscrevene stucke unde ein jewelk bit sik lave wii borghermeistere unde radmanne to Hamborch vor uns unde unnsse nakomelinghe deme obghenanten junckhern Olricke unde sinen rechten erven stede vast wol to holdende in groten loven unde guden truwen; unde hebben desses to tuchnisse unnsser stad inghezeghel heten henghen to desseme breve. Na der bord Cristi verteinhundert jar, darna in deme vif unde veftighesten jare, des donrsdaghe na der hilghen drier koninghe daghe.
x
| Archiv | NStA |
|---|---|
| Bestand | Rep. 1 (Große Urkundensammlung) |
| Zugangsnummer | R001 |
| Inventarnr. | 0021 |
| Jahr | 1455 |
| Datumcode | JpEpipha |