Egberdt Alberda hoefflynck doe kundt ende certificere in ende
vermits dessen yeghenwoerighen certificatie dat ick
int seker wal weet dat myn saelighe vader to voeren
ende yck nae, mit sampt neve Reynt Alberda ende salige Egbert
Scatter thosaemen hebben verhuirdt salighe Renko Edzens
ende Claes syn huysfrouw upt Sandt onsen heerdt landes soe
dat de verhuiringhe van alle dre voerbenoemden lantheren
allendt de jaermaelen up een tidt angenck Des soe
bevinde yck in myn salighen vaders rekenboeck (want voerscr.
meyer nuwerlde certer ofte huircedel vanden lantheren entfanghen)
dat voerbenoemde meyer van alle dre voerseide
lantheren by myn saliger vaders levent heft inghehuirdt
de jaeren angaende inden jaere soeven ende vyftich ses jaer
lanck, daernae van my weder ingehuirdt inden jaere
veer ende tsestich angaende ses jaer duirende ende vermits
desen verloep niet weder in ghehuirdt soe dat dye jaren
uut syndt de meyer Renke oeck verstorven heft
Claes de weduwe hoeren soen Ecke Renkens beraeden
ende mit hoer in den huise geholden dat landt thosaemen
dit verleden jaer sunder enighe inhuiringhe gebruicket
Dat oerkunde yck Egbert Alberda hoefflinck upgemalt
myt myn pitzier up spatium thedruckt ende myn naeme
myt egender handt daer by gheschreven up den soeventinden
dach januarij anno etc. XVc een ende tsoeventich.
Egbert Alberda (handtekening).

x

x

Archief	Groninger Archieven
Fonds	Coll. Keiser
Toegangsnummer	657
Inventarisnr.	0009
Register Feith	1571.075
Jaar	1571
Datumcode	1701

x

x

Materiaal	papier