Godevaert van den Hove verkoopt aan de abdij te Assen 1/3 in een rente van 2 mudden winterrogge uit Assinghegoet te Obeslo in de buurschap van Halen in het kerspel van Beylen. Met medebezegeling door de dedingsman Rolof van Steenwijc.

Ic Godevaert vanden Hove doe cundich allen luden mit desen open brieve dat ic vor mi vor mine
erfnamen ende vor mine nacomelinghe vercoft hebbe den abdissen ende den convente van Assen een derdeel
van twee mudde winterrogghen de ic jaerlix hadde over Assinghegoet to Obeslo dat in den buerscap
van Halen ghelegehen is in den kerspel van Beylen om ene summe van ghelde de mi vol ende al betaelt
is also dat ic noch mine erfname ende mine nacomelinghe nemmermeer dat vorseide Assinghe
goet en zolen bet aenspreken vor dat vorscreven derdeel van tween mudden mer dat convent van
Assen sal des ewelike ende erflike bruken sonder wedersegghen. Ende waert zake dat convent van Assen
enighen scade lede van aenspraken van den vorscreven derdel van twe mudde winterrogghen van enighen
luden die des to rechte comen willen daer sal ic se af ontheffen ende scadeloes holden. Alle arghelist ende
nie vonde uteghesproken. In kennesse der waerheit so hebbe ic Godevaert vorseit desen brief
bezeghelt mit minen zeghele to eenre vaster orcunde. Ende om die meerre zekerheydt wille so heb
ic ghebeden mit den convente van Assen Rolof van Steenwijc die desen coep ghemaket ende ghede-
dinghet heeft dat hi desen brief mede bezeghelt heeft mit sinen zeghele. Ende ic Roelof van Steen-
wijc hebbe der bede wille Godevaerds van den Hove ende des convents van Assen vorscreven desen brief
mede bezeghelt mit minen zeghele tot enen tughe. Ghegheven in den jare ons heren dusent drie
hundert neghen ende tseventich des Zonendaghes na sinte Matheus dach appostel ende ewangelisten.

x

x

Archief	Drents Archief
Fonds	Arch. Abdij Assen
Inventarisnr.	5
Regestnr.	29
Jaar	1379
Datumcode	DpMatthe

x

x

Commentaar	De 2 zegels zijn verloren.

x

Materiaal	perkament
Afmeting (mm)	215/105

x

Edities	OGD, nr. 674

x