| Nummer:oub1607 | Datum:4. Okt. 1498 | Overlevering:Editie | Vindplaats:Ostfriesisches Urkundenbuch, II, S. 591, nr. 1607 |
Pfarrer Boyo (Meyen) bekundet einen Gütertausch zwischen dem Kloster Marienthal zu Norden und dem Bolard von Jemgum.
Ich mester Boyo, decretorum doctor, kerckher to grote Phaleren ende vicarius perpetuus der kercken to Emden, bekenne unde bytughe myt mynen apenen breve vermyts dussen transfix vor alsweme, wo vor my is ghekomen de erwerdighe heren, her Ghert Schulenberch, to sunte Mariendael abbet[*] to Norden, unde synes koventes kynder, (unde bekanden), dat se myt wolberaden modes hadden vorwesselt unde verbotet ses grase landes in Lherltere hammerk, de fenne streckende myd den westerende an den Boenesche, myt der sudersijt an den olden wech, den ersamen manne Bolhardo van Jemghen; dar desse ergenante Bolhardo my ses grase wedder vor dan heft, ligghen in Fysqwarder (hammerck) in ene fenne, gheheten de hoghe ses grase, na utwisinghe seghel ende breve, dar desse transfix doerghetoghen is, unde desse bute schal to ewighen tiden stan sonder alle arghelist, de dessen transfix hinderen moghen. Tugheslude de hirto gheropen sint her Gherrolt, de to Fysqwart kerckher plach to wesen, unde Hermen, provener to Norden. In orkunde der waerheit, so heb ick mester Boyo, decretorum doctor ergenant, myn geseghel beneden an dessen transfix dorch bede willen des erwerdighen heren her Ghert Schulenberch ergenant don hanghen. Datum anno Domini Mo CCCCo XCVIIIo, up den dach Francisci confessoris.
