Die Stadt Bremen vermittelt zwischen den Häuptlingen Edzard und Ulrich einerseits und Hayo Harldes und Lubbo Onken andrerseits Frieden, und bewirkt die Ernennung von Schiedsrichtern.
In deme jar unses Heren MoCCCCoXLIo, des dinxendages na Pinxterachten hebben ghededinghet de ersamen lude, her Johan Vrese, borghermester to Bremen, unde Helmrick Fikentzolt ene vruntlike sone tusschen den ersamen Edzerde to Emeden, Norden etc. unde Ulrike to Esense, Awerke etc. hovetlinge[*] myt eren vrunden van der ene syt, unde den ersamen Haye Harldes to Yever, Ostringe, Wangen etc. und, Lyubbe Onken to Krypense hovetlinge an der anderen syde, int erste, so dat se[*] alle schelinge, unwylle unde twydracht scholen bliven by 4 personen van beyden tziiden, [*] se to[*] vorscheden in vruntschap edder in rechten; weer aver, dat dese achte sick nicht vordreghen kunden, so scholen se kesen enen overmann to beyden tziiden, de alrede genompt is, dar se all erer sake by bliven scholen, darup scholen se broders vorscr. de Kancken to borghe don 20 guede mans undder Edserde unde Ulrike beseten, unde wat dusse, vorg. 8 personen scheden, dar scholen se by bliven unde truweliken holden; wer aver, dat se des nicht en deden, so scholen de 20 borgen de Kancken wedder in bringhen unde[*] wat eer dusser tiit ghededinget is, dar scholen se bi bliven. Ock wes dusse vorben. schedeslude Haye unde den Kancken toscheden, dat scholen em Edserde unde Ulrick holden, in der mate scholen se em wedder don.[*] Vorder scholen Hayen knechten dach gheven up lofte unde up ede to der tiit, dat dusse schedeslude syk vordraghen hebben, unde se scholen de anderen vangen schatten na eren vormoghe, desghelikes za1 Haye ok don.[*] Unde alle de ghene, de in dusser vede ghewesen hebben, scholen in dusser sone mede vorward wesen. Weer aver yement, de dusse vorscreven schedinghe nicht en helde, dar wylt de rad to Bremen unde dat land to Butyade mede hebben, de desse schedinghe wyl holden yeghen den ghenne, de des nicht en holde. Alle dusse vorg. articlen hebben wy Edserd, Ulrick, Haye unde Lyubbe vorben. hovetlinge in gueden truwen ghelovet stede unde vast to holden zunder alle argelist.
x
| Edities |
E. Friedländer, Ostfriesisches Urkundenbuch I (Emden 1878), nr. 525 |
