Das Kloster Termünten verkauft an das Johanniterordenshaus zu Jemgum das Gut Tyarda hamryk im Kirchspiel Bingum.

Wy her Ulbet abbet tor Munten[*] don kundich unde openbar allen guden luden, de dussen breff zeen eder horen lezen, dat wy myt berade unde vulbort unzer brodere des conventis tor Munten vorscr. van sunte Bernardes orden, vorkopen und hebben vorkoft vor uns unde unze nakomlynge[*] heren Edzerde yn der tyd commendur tho Gemmyngum[*] van sunte Johannes orden baptisten, den ghemenen brodere unde oer nakomlynge, dat erve unde goet gheheten Tyarda hamryk, beleghen yn den kerspel to Bynnyngum[*] van der Emze over Morssloet yn dat west, alzo veer als de Holtgast[*] yn dat west gaet tho enen slote, de gheheten ys de olde wech, alzo breed als de hamryk ys, sued unde[*] noerd, als Egtzyn tho Bunda[*] und zyn olders ghe-bruket hebbet unde em tho rechte thobehoret, vor ene summen gheldes, de uns degher unde al wol betalet ys, desse vorscr. kop stede unde vast to holden, al arghelyst unde nygevunde utghesproken. Welk erve unde g t Egtzyn vorscr., ghezunt unde mechtich lyves unde zynnes, umme zelycheyt syner unde zyner wrunde zelen hefft ghegheven unzen closter tor Munten vorscr. to bruken unde bekeren to des klosters beste. Wert over dat wo dyt vorscr. erve atzo Tyarda hamryk anspreken offte bekummeren wolde myt rechte, zo scholden unde wolden, scholet unde wyllet dat wederstaen unde weren myt rechte, wy, her Ulbet vorscr., ghemenen broders unde unze nakomlynge buten schaden unde unkost des convents to Gemmyngum vorscr. In dessen vorscr. cop unde dedinge hebbet an unde over ghewezen Alricus de provest tho Hartzum, [*] her Kone curet tho Gemmyngum, her Gheltyko curet tho Bynnyngum, her Johan vicarius tho Geminyngum, Egtzyn to Bunda, Hoytet tor Gast, [*] Erd Wylffs to Bynningum, Popko unde Emmo tho Bynningem unde anders vele guder lude ghenoch. Yn en orkunde unde warheyt dessen vorscr. kopes, zo hebbe wy her Ulbet vorscr. van heten weghene unser brodere unsen conventes ynsegel hangen dan beneden to dessen breve, myt ynsegel heren Thomas provest tho Wener, heren Alrykes provest tho Hartzum, heren Gheltikes kerkheren to Bynningum, Egtzyns to Bunda. Yn de yare unses Heren M^o CCCC^o XXXVI^o, up sunt Egidii dach des abbates.

x

x

Fonds	Ostfriesisches Urkundenbuch, I
Fol.nr.	S. 419
Nr	461
Olim	Orig. Kommende Jemgum Nr. 7.
Jaar	1436
Datumcode	Egidii

x

x

x

Commentaar	Siegel: 1. Fehlt. 2. Ein Geistlicher in einer Nische, zu s. Füssen ein unkenntl. Wappenschild. Umschrift: eener (?). 3. Figur in einer Nische. 4. Fehlt. 5. Linksaufgerichteter Löwe. S. Egdsi Aild.

x

Materiaal	papier

x

Edities	E. Friedländer, Ostfriesisches Urkundenbuch I (Emden 1878), nr. 461