| Nummer:oub0390 | Datum:10. Nov. 1430 | Overlevering:Editie | Vindplaats:Ostfriesisches Urkundenbuch, I, S. 361, nr. 390 |
Die Gemeinden im Overledinger-, Moormer-, Norder-, Auricher- und Brokmerlande verbünden sich mit denen des Emsigerlandes und den Häuptlingen daselbst, sowie mit dem alten und neuen Norderland, dem Kirchspiel Nesse und überhaupt allen Landen von Stavoren bis zur Jade zur Vertheidigung Friesischer Freiheit und Friesischen Rechtes, und fassen Beschlüsse wegen der Burgen des Emsigerlandes, der Bündnisse mit Anderen und über die Erhaltung der Deiche und Siele nach Deich- und Sielrecht.
De handt des almechtigen Gades sy allen menen Fresen een vorschilt tho hulpe und tho troeste in allen guiden fryen wercken etc. Witlich kundich sy allen erbaren gulden luiden und allen ummelanden ihn menen Vrislande, de dusse jegenwordige schrift seen oder hoeren lesen, dat wy mene meente ihn Overledinger, Moermer, Norder, Auriker und Broekmer lande mit den erbaren menen hoevetlingen und mene mente ihn Eemsigelandt, als by namen Enno Edzardtsna, olde Imele, Sibrant, Wiart und Friderick, [*] hoevetlinge tho Greetzyll, Grimersum, Edelsum, Uphuisen unde tho Larrelte und mit dat olde und nye Norderlant und erer gemeenschup und mit dat karspell tho Nesse und mit anderen lande van Staveren bet over de Jade uns hebben samptlichen, lefflichen und fruntlichen verbunden, vordragen und voreniget, und jegenwordich vorbinden, vordragen und vorenigen mit leve und mit frunschup ihn een warer vorbunt und upgestaveden vingeren, als wy voerscr. ock staen ihn ware vorbunt mit bezegelden brieve mit der stadt van Bremen und ander steden ihn aldus daniger vordrach, dat wy gemeene meente ihn dussen vorgenoempten landen willen mit der hulpe Gades almechtich fry, Freesch, de ene mit den anderen bystandich wesen, und bescharmen unse overolderen vaders recht, van koninck Carolo beschreven recht, und by der gemene Fresen lantrecht und frydome tho ewigen tyden tho blivende und tho bruikende und nhu lenger gene egendoeme[*] tho lidende; und de sloete unde vestenisse ihn Eemsigerlandt tho blivende mit heerlicheiden und recht van alle ummelande ihn alsulcker formen als de nhu gelegen sint buiten Eemden; uthgesecht het weer sake, dat de van Eemden voerscr, wulden doen und bliven by alle mene Friesen, als voerscr. iss; und alle dusse voerscr. sloete und vestenisse ihn Eemsigelandt und ihn anderen lande den gemeenen Freesen opene sloete tho wesende tho oren besten, gene schaeden darvan tho kamende baven lantrecht. Weert ock saeke, dat dar schaede van schege, als voerscr. iss, und de gene, de den schaeden dede, den schaeden voerscr. nicht beteren wulde nha landtrecht, so schulde men de sloete und festenisse vorstoeren und vorwoesten, up dat den gemenen Friesen dar geen schaede, vordreet und egendoem darvan queme tho ewigen tiden und melcanderen rechtes tho plegene nha koninck Caroli recht und lantrecht der gemene Fersen claege und saeken tho richtende. Item weert saeke, dat dar jeniche hoevetlinge stunden int vorbunt mit brieven offte mit loefften mit anderen hoevetlingen offte Duitschen heren offte Friesen, de schulde syner eren mit synen knechten vorwaert weten, anders tho doende gelick ander gemeene Friesen. Item so schall alle man syne dike und damme holden nha dickrecht und sillrecht, offte nha alle mene Friesen settinge und wille, offte nha landes willkoer, dar de dike und damme ihn gelegen sinnen. Dusse voerscr. articulen und puncten unde dedinge scholen und willen wy voerscr. mallich mit den anderen truwlich und vast holden, frye, Fresch mit malcanderen tho bescharmene tho ewigen tyden, sunder alle argelist und nie vunde und de wercke der luide, wo se hebben ahn de sloete tho doen, waer des behoeff iss, unde den menen Friesen nutt iss tho schickende, dar mit mellcanderen liff und guidt tho wagende und alle Duitsche heren buiten den lande tho holdende, und weert dat dar jemant dede, offte begunde tho doende tegen vorgeschreven articulen, de schulde vorboert hebben syn liff und alle syn woillvaert. Ihn orkunde dusser waerheit und merer bekentenisse, so hebben wy gemene Broekmannes unser lieven Fruwen segell[*] und wy mene Norder olde lant unse ingezegell vor uns und van der ummelanden wegen witlich hangen laten ahn dat spatium dusses brieves, int jaer unses Heren dusent veerhundert und dertich, up sunte Martens avent episcopi.
