Ulbed Feezna in Larrelt verkauft der Kommende Abbingwehr drei Moorstücke.

Ick Ulbed Feezna tho Hlerlert unde Hoyka, myn echte huesfrowe, betughen jeghenwordich in kracht unde macht desses apenen beseghelden breves vor alsweme etc., wo wy myt vrien wyllen hebben vorkoft dre lande moers, beleghen by Eybe Dekana moer by der oestersyde, den vorsichtigen commendator heren Auwen unde den ghemenen broderen unde susteren der orden sancti Johannis baptisten to Abbingewer vor enen summen gheldes, de my Ulbod vorscr. vul unde al wal is betaelt na mynen wyllen, zo dat ic updraghe unde quytschelde den vorscr. moer vor my unde de myne, ze syn baren edder unghebaren, ende de broders des vorbenoemden conventes moghen dat moer bruken, vorhuren, vorwesselen, vorsetten edder vorkopen na eren willen sunder al ansprake, hulperede, arghelist offte nye vonde, dar men dessen bref mach mede nederlegghen edder vorkrencken. Hijr hebben an unde aver ghewezen als vor tugheslude gheesket, int erst Wyart Bentedzna to Osterhusen, Nonne Hayena tho Forleydz unde Remme Hollander. To merer tuchnisse der warheit zo hebben wy her Auwo unde Ulbod vorbenoempten ghebeden den vorsichtigen heren Memmen, kercheren to Grimadzum, umme dessen breff to beseghelen; unde ich Membodus vorscr. hebbe wytliken ghehangen mynen ingheseghel ant spacium desses breves. Int jair unses Heren M^o CCCC^o XCIII^o, des daghes Victorini martyris.

x

x

Archief	NStA
Fonds	Rep. 1 (Große Urkundensammlung)
Toegangsnummer	R001
Inventarisnr.	0764
Jaar	1493
Datumcode	GerVic

x

x

x

Commentaar	Anhängendes Siegel verloren.

x

Edities	Editie naar dit exemplaar: oub1367.