| Nummer:oub1640 | Datum:Leeuwarden, 5. Okt. 1499 | Overlevering:Editie | Vindplaats:Ostfriesisches Urkundenbuch, II, S. 616, nr. 1640 |
Entwurf des Huldigungseides der Grafen Edzard und Uko von Ostfriesland für den Herzog Albrecht von Sachsen als Statthalter von Friesland (und Versprechen, binnen 4 Wochen eine endgültige Ausfertigung des Eides übersenden zu wollen. Vergl. Anm. I).
Wy Edzardt unde Hugo, gebrudern, graven tho Ostfresslandt etc., bekennen vor uns und unsen erven unde nakomelingen, naden die durchleuchtige hochgeborne furst und herr, herr Albrecht, hartoge tho Sassen, lantgrave in Doering unde marckgrave tho Missen, Romischer kay. may. und des hylgen richs ewige gubernator in Friesslandt, siner gnaden erven unde nakomelingen, by den durchleuchtigesten und grotmechtigsten fursten unsen allergnedigsten herrn, herrn Maximilian, Romischen koeninck, und den churfursten, geistlichen und wertlichen, gestelt und geordinert in ein ewig gubernator unde poetestadt in Friesslandten, na inholdt Romischer key. commission, die wie ock gesehen und gehoert hebben; wi volgende dieselve commissie und beveld hebben vor uns, unser erven und nakomelingen einer furstlichen genaden, siner genaden erven und nakomelingen angenamen und bekendt, bekennen und nemen an vor uns und unsen erve und nakomelingen midt desem brief mit allen graffschappen, unsen landen, herlicheiden und undersaten vor enen ewigen gubernator und potestaet van wegen und in namen Romischer kon. may. commission, als sine genade darup hefft, und darup hebben wi siner f. genade, siner gnaden erven, als ewige gubernator und potestaet gehuldet, geloeft und liflichen tho den heylgen geschworen, hulden, geloven unde schweren siner genaden erven und nakomelingen hirmede trew und holdt und gehorsam to sin, oerer gnaden best end vordeel tho raden unde schade tho verhoeden und alle tho doen, dat ein gudt grave des heilgen richs der kon. may. und dem heyligen rick und sinen f. gnaden als ewigen gubernator und potestaet in stede kon. may. schuldig is tho doene. Ock willen wi sine f. gnaden und siner gnaden erven und nakomelingen tot allen tiden hulpe und bystandt doen, die Frieslanden, die siner gnaden underdanich gemaket hefft, helpen to underholden und die noch ungehorsam sindt, siner f. gnaden, siner gnaden erven und nakomelingen na allen unsen vormuegen helpen thom gehorsamheidt brengen; wi, unser erven und nakomelingen sullen und willen ock unse graffschuppen, herlicheiden, landen und lueden, also dick unde mennichmal als dat gevaldt, van unsen gnedigen heren van Zassen, siner gnaden erven und nakomelingen, als von wegen der Rom. kon. may. und des heyligen richs als van einen gubernator und nicht anders tho lehen endtfangen, alle dinck sonder archlisticheidt.[*] Und tho vaster underholdunge aller deser vorgeschreven puncten und artickelen hebben wi Edzardt und Hugo, gebruedern van Ostfresslandt vorgescr., voer uns, unse erven unde nakomelingen unsen segel wetelick und willichlick an desen brieff lathen hangen. Gegeven up den vyften dach des monats Octobris, anno XIIIIo. XCIXo.
