| Nummer:oub1348 | Datum:17. Febr. 1493 | Overlevering:Editie | Vindplaats:Ostfriesisches Urkundenbuch, II, S. 378, nr. 1348 |
Schuldbrief über eine Summe Geldes, für welche der Schuldner Hilzert Feykena dem Gläubiger Propst und Häuptling Gerd Beninga die Haringafenne verpfändet und ausserdem jährlich einen Zins von 5 Prozent zu geben verspricht.
Wittilik unde kundich sy allen ersannen vromen luden, beide gheestliken unde wertliken, de dussen breeff zeen, horen, lesen, wo int jar unses Heren dusent veerhundert dre unde neghentich, des sondaghes vor Vastelavent, vor my her Suncken, prebendarius to Grimetzum, hebben ghewesen Gherld Beningha, provest to Hinte unde hovetlingk to Grimetzum, unde Esse syn erbare husfrouwe, unde Hilzert Feykena, so dat se hebben gherekent mit malkander unde des rekenschupes sint avereenghecomen, so dat Hilzert vorscreven blifft deme erbaren Gherld Beninga sculdich ses stighe Rinscher guldene unde seven Rinsche guldene unde derdehalf lichte Arensgulden. Dit vorscr. gelt is gegeven up Haringhafen, ende dit vorscr. lant moghen salighe Feyken unde Hilzerde kinder lozen mit er sulves godere, halff mit golde unde halff mit sulverghelde, na ghewerde der Rinscher guldene. Oek voer dit vorscr. ghelt scal tosen to renthe geven des jares vor twintich Rinsche gulden enen Rinschen gulden ter tyd, dat dit vorscr. last ghelozet wert. So sint dusser breve twe mit ener hant ghescreven unde de ene uth den anderen ghesneden, ghetekent als by neden steit.
