| Nummer:oub0437 | Datum:6. Okt. 1434 | Overlevering:Editie | Vindplaats:Ostfriesisches Urkundenbuch, I, S. 399, nr. 437 |
Die Häuptlinge Hayo Harlde zu Jever, Ineke Tannen zu Wittmund und Lubbo Onneken zu Kniphausen verpflichten sich zur Erhaltung des Thurms und der Kirche zu Östringfelde.
Wytlik, kundich unde openbaer zii all den ghennen, der dessen breff zen off horen lesen, dat wy Haye Harlde to Geyer, Ineke Tannen to Witmund unde Lyubbe Onkelde to Kripense bekennen unde betughen clarliken in der warheit vor allesweme mit craft desses breves, dat wy edder unse kindere, boren unde aneboren, offte nemende van unser weghen scholen edder willen rad, dad offte vulbort dar to gheven edder doen hemeliken offte openbaer, dat men den toern edder de kerke tho Ostringevelde besette, behindere offte vorkrenke yerghen an; men wert yemende van Dudeschen edder van Vresen de dessen vorben. toern dachte myt weldigher hand to besetten, der God vorbede, so schole wy unde willen dat truweliken helpen keren unde weren myt lyve unde myt gude na all unser macht, ghelik den gansen lande, und helpen dar to, dat desse vorben. toern unde kerke yo blive bi ere ghestelike rechticheit in de ere Godes und unser leve Vrouwe. Des to tuge in der warheit so hebbe wy Haye Harlde, Ineke Tannen unde Lyubbe Onkelde vorben. unse ingesegele witliken hangen heten to dessen breve. Ock vorder umme merer bewisinge der warheit vorscr. so hebbe wi her Bartold Bradenkoll, provest in Ostringe, her Onko unde her Menard kerckheren to Geyer, her Lyubbe to Tettense, her Tamme to Schortense, her Dedeko to Ackem, her Eve to Fedderwert, her Ydsert unde her Lyubbe to Synnwert, unde her Meringh to Gokerke[*] unse ingesegele mede hangen heten to dessen breve. Gescreven na der borth Christi verteyn hundert yaer, dar na an deme veer unde dertigesten yare, des achten dages sunte Michahelis.
