| Nummer:oub1739 | Datum:11. Juni 1401 | Überlieferung:Editie | Fundstelle:Ostfriesisches Urkundenbuch, II, S. 698, nr. 1739 |
Keno tom Brok trägt dem Herzog von Geldern und Jülich, Grafen von Zutphen, alle seine Lande und Schlösser nach Zutphenschem Rechte zu Lehn auf.
Ick Keene van den Broeck, soen wilneer heren Ocken van den Broeck ridders, doen kont allen luyden mit denen apenen brieve ende bekenne, dat ick in tegenwoordicheit der eirberre mannen, heren Henricks, heren van Ghemen, ridders, heren Johans Balin, deken tot Zutphen, ende Arndt Riecks, oeverste rentmester der lande van Gelre, opgedragen heb ende opdraeeh myt hande ende mit monde den hoichgeboeren durluchtigen fursten, hertoge van Gelee ende van Ghulich ende greve van Zutphen, mijnen lieven genedigen heren, allsulcke lande, luyden ende sloeten, als hiernae bescreven staen. In den iersten dat lant tot Broeke myt allen den sloeten, die dairin belegen zijn. Item dat lant to Awerck mit den sloeten dairinne belegen. Item dat lant tho Norden mit den sloiten dairin belegen. Item dat lant to Herlinghen mitten sloeten dairinne belegen. Item dat lant to Oestringen mit dem sloeten dairin belegen. Item dat lant te Lengerne mit dem sloeten dairin belegen. Item dat lant van Aprinerlande (!) mitten sloeten dairin belegen. Item dat lant van Averladerlande mitten sloeten dairin belegen. Item dat lant van Sagelterlande mit den sloeten dairin belegen. Item dat lant van Emesgerlande mitten sloeten dairin belegen, uytgespraken Emden; all dese vurscr. lande, lude ende sloete te hebben ende te holden tot eenen Zutphense leen van mijnen genedigen here den hertoge van Gelre voirscr., nae inhalt ende uytwijsingen dess eens apenen brieffs bezegelt mit mijnen zegell, dair ich mijnen genedigen here vurgen. ynne verbonden byn, in alle der maiten als dieselve brieff ynnehelt ende begriept. Alle arglist hierinne uytgespraken. In oirkonde der waerheit alle deser dingen voirscr. so heb ick desen brieff bezegelt mit mijnen zegell. Gegeven in den jair ons Heren Mo CCCCo ende een, op sunte Odulphen avont.
